Research Articles

Babu Cherian was one of the key-resource persons of ‘Kerala Total Literacy Campaign’ phase-I.
Now he is the Executive Director of Benjamin Bailey Foundation.

ആദ്യകാല പത്രമാസികകൾ മലയാളഭാഷയുടെ ആധുനികതയുടെ രൂപങ്ങൾ (Early newspapers Forms of Modernity in Malayalam)

ഡോ. ബാബു ചെറിയാൻ

കേരള സമൂഹത്തിന്റെ ആധുനികീകരണത്തിനൊപ്പം സംഭവിച്ച ഒരു സാമൂഹിക പ്രക്രിയയാണ് മലയാളഭാഷയുടെ ആധുനികീകരണം. കേരളസമൂഹം ആധുനികപൂർവ്വ ഘട്ടത്തിൽ നിന്ന് ആധുനിക ഘട്ടത്തിലേക്ക് മാറിയപ്പോൾ കേരളത്തിന്റെ ഭാഷയും അതിന്റെ ഉൽപ്പന്നങ്ങളും അത്തരമൊരു മാറ്റത്തിന് വിധേയമാകുകയാണുണ്ടായത്. സമൂഹപരിണാമത്തിന്റെ പിന്നിൽ പ്രവർത്തിച്ച ഘടകങ്ങൾതന്നെയാണ് ഭാഷയുടെ പരിണാമത്തിനു പിന്നിലും പ്രവർത്തിച്ചിട്ടുള്ളത്. പാശ്ചാത്യ സമൂഹത്തിന്റെ ആധുനികതയ്ക്കും തൽഫലമായ നവോത്ഥാന -നവീകരണങ്ങൾക്കും കാരണമായിത്തീർന്ന ആധുനികതയുടെ (ാീറലൃിശ്യേ) ഇന്ത്യൻ രൂപമായ കോളനി ആധുനികതയാണ് (രീഹീിശമഹ ാീറലൃിശ്യേ) കേരളസമൂഹത്തിന്റെ ആധുനികതക്കു നിമിത്തമായിത്തീർന്നത്.
പത്തൊമ്പതാം നൂറ്റാണ്ടോടുകൂടിയാണ് കേരളീയ സമൂഹം ആധുനികീകരിക്കപ്പെട്ടുതുടങ്ങിയത്. അതിനുമുമ്പ് കേരളത്തിൽ നിലവിലിരുന്ന ഫ്യൂഡൽ സാമൂഹിക ബന്ധങ്ങളെയും അതിനെ നിലനിർത്തിപ്പോന്നിരുന്ന സാംസ്‌കാരിക 'മേൽപ്പുര'യെയും പറിച്ചെറിഞ്ഞ്, കോളനി ആധുനികത കേരളത്തിലേക്ക് പ്രവേശനം നേടിയത് രണ്ടുകാര്യങ്ങളിലൂടെയായിരുന്നു. ആ രണ്ടുകാര്യങ്ങളിൽ ഒന്നാമത്തേത് ഒരു സാമൂഹിക പ്രക്രിയയും രണ്ടാമത്തേത് ഒരു സാങ്കേതിക വിദ്യയുമായിരുന്നു. സാമൂഹിക പ്രക്രിയ, സൗജന്യവും സാർവ്വത്രികവും, സമസ്ത ജനവിഭാഗങ്ങൾക്കും ലഭ്യവുമായ ആധുനിക വിദ്യാഭ്യാസവും സാങ്കേതികവിദ്യ അച്ചടിയുമായിരുന്നു. ചുരുക്കത്തിൽ കേരളത്തിന്റെ നവോത്ഥാനത്തിനു കാരണമായിത്തീർന്ന കോളനി ആധുനികതയുടെ പ്രചണ്ഡവാതം കേരളത്തിലേക്ക് പ്രവഹിച്ചത് ഈ രണ്ട് വാതായനങ്ങളിൽക്കൂടിയായിരുന്നു. കേരളത്തിന്റെ സാംസ്‌കാരിക ജീവിതത്തിൽ കോളനി ആധുനികത പ്രസരിച്ചത് അച്ചടിയിലൂടെയും അതിന്റെ ബഹുമുഖ വ്യാപാരങ്ങളായ പത്ര-മാസികാ പ്രസിദ്ധീകരണം, പുസ്തക പ്രസാധനം, ആധുനിക ഗദ്യത്തിന്റെ വികാസം, ഗദ്യഭാഷയുടെ മാനകീകരണം (േെമിറമൃറശമെശേീി), വിവിധ ഗദ്യസാഹിത്യശാഖകളുടെ ഉൽപ്പത്തി-വികാസം എന്നിവയിലൂടെയാണ്. കോളനി ആധുനികത, ആധുനികീകരണത്തിന്റെ പ്രചാരണ-പ്രയോഗങ്ങൾക്ക് നിമിത്തമായിത്തീർന്ന ഘടകങ്ങൾ എന്നീ കാര്യങ്ങൾ മുൻനിർത്തി ആലോചിക്കുമ്പോൾ മലയാളഭാഷയുടെ ആധുനികീകരണത്തിൽ ആദ്യകാല പത്രമാസികകൾ സുപ്രധാനമായ പങ്ക് വഹിച്ചിട്ടുണ്ടെന്നു വ്യക്തമാകും.


മലയാളം അച്ചടി, പത്രമാസികകൾ;
ആധുനിക കാലത്തും ആധുനിക സാങ്കേതിക വിദ്യയിലും

മലയാളം അച്ചടിയുടെ പ്രാരംഭ ഘട്ടം, ആദ്യകാല പത്രമാസികകൾ എന്നിവയെ സംബന്ധിച്ച്, കാലഗണനാടിസ്ഥാനത്തിലുള്ള ചില കാര്യങ്ങൾ അറിഞ്ഞിരിക്കേണ്ടതുണ്ട്.
കേരളത്തിൽ മലയാളം അച്ചടിക്കും പുസ്തക പ്രസാധനത്തിനും തുടക്കംകുറിച്ചത് സി.എം.എസ്. മിഷനറിയായ ബെഞ്ചമിൻ ബെയിലിയാണ്. 1821 ൽ കേരളത്തിലെ ആദ്യബഹുഭാഷാ മുദ്രണാലയം (കോട്ടയം സി.എം.എസ്. പ്രസ്സ്) സ്ഥാപിച്ചുകൊണ്ട്, അദ്ദേഹം അച്ചടിക്ക് തുടക്കമിട്ടു.
1824: കേരളത്തിൽ അച്ചടിച്ച ആദ്യമലയാള പുസ്തകം ചെറുപൈതങ്ങൾക്ക ഉപകാരാർത്ഥം ഇംക്ലീശിൽ നിന്ന പരിഭാഷപ്പെടുത്തിയ കഥകൾ കോട്ടയം സി.എം. എസ്. പ്രസിൽ അച്ചടിച്ച് പ്രസിദ്ധപ്പെടുത്തി. ബെഞ്ചമിൻ ബെയിലിയായിരുന്നു ഈ കൃതിയുടെ പരിഭാഷകൻ. (ഇതിനുമുമ്പ് മത്തായിയുടെ സുവിശേഷം എന്ന ലഘുകൃതിയും മറ്റുചില ലഘുലേഖകളും സി.എം.എസ്. പ്രസിൽ അച്ചടിച്ചതായി രേഖകളുണ്ടെങ്കിലും അവയൊന്നും ലഭ്യമായിട്ടില്ല). ഇതിനെത്തുടർന്ന് ധാരാളം കൃതികൾ (പൊതുഗ്രന്ഥങ്ങളും പാഠപുസ്തകങ്ങളും) സി.എം.എസ്. പ്രസ്സ് പ്രസിദ്ധപ്പെടുത്തി.
1847 ജൂൺ : മലയാളത്തിലെ ആദ്യ മാസികാപത്രവും വൃത്താന്തപത്രവുമായ 'രാജ്യസമാചാര'ത്തിന്റെ ആദ്യലക്കം തലശ്ശേരിക്കടുത്തുള്ള ഇല്ലിക്കുന്നിൽനിന്ന് പ്രസിദ്ധപ്പെടുത്തി.
1847 ഒക്ടോബർ : ഇല്ലിക്കുന്നിൽനിന്നുതന്നെ 'പശ്ചിമോദയം' എന്നപേരിൽ മലയാളത്തിലെ രണ്ടാമത്തെ ആനുകാലിക പ്രസിദ്ധീകരണം ആരംഭിച്ചു.
1848 വൃശ്ചികം (നവംബർ) : മലയാളത്തിലെ മൂന്നാമത്തെ വൃത്താന്തപത്രം 'ജ്ഞാനനിക്ഷേപം' ജോൺ ഹോക്‌സ് വർത്തിന്റെ പത്രാധിപത്യത്തിൽ കോട്ടയത്തുനിന്ന് ആരംഭിച്ചു. ('ജ്ഞാനനിക്ഷേപ'ത്തിന്റെ സ്ഥാപക പത്രാധിപർ ബെഞ്ചമിൻ ബെയിലിയാണെന്നൊരു തെറ്റിദ്ധാരണ എങ്ങനെയോ കേരളത്തിൽ പ്രചരിച്ചിട്ടുണ്ട്. 'ജ്ഞാനനിക്ഷേപ'ത്തിന്റെ സ്ഥാപക പത്രാധിപർ ജോൺ ഹോക്‌സ് വർത്തായിരുന്നു. അത് അച്ചടിച്ചത് ബെഞ്ചമിൻ ബെയിലിയുടെ അച്ചടിശാലയിലായിരുന്നുവെന്നുമാത്രം.)
1864 ജൂലൈ : നാലാമത് മലയാള മാസികാപത്രമായ 'വിദ്യാസംഗ്രഹം' കോട്ടയം സി.എം.എസ്. കോളജിൽനിന്ന് പ്രസിദ്ധീകരിച്ചുതുടങ്ങി.
1865 ഓഗസ്റ്റ്:  അഞ്ചാമത് മലയാള ആനുകാലികമായ 'പശ്ചിമതാരക' പ്രസിദ്ധപ്പെടുത്തിത്തുടങ്ങി.
ആധുനികത എന്ന പരികൽപ്പന മുൻ നിർത്തി ആലോചിക്കുമ്പോൾ മേൽപ്പറഞ്ഞ പത്രമാസികകളിൽ, തലശ്ശേരി മാസികകൾക്കും കോട്ടയം മാസികാപത്രങ്ങൾക്കും തമ്മിൽ അച്ചടിക്കുപയോഗിച്ച സാങ്കേതികവിദ്യ, ഉള്ളടക്കം എന്നീ കാര്യങ്ങളിൽ കാതലായ വ്യത്യാസങ്ങളുണ്ട്. 'രാജ്യസമാചാര'വും 'പശ്ചിമോദയ'വും കല്ലച്ചിൽ അച്ചടിച്ച് പ്രസിദ്ധീകരിച്ചപ്പോൾ 'ജ്ഞാനനിക്ഷേപം' മാറ്റിവെക്കാവുന്ന അണിയച്ചുകൾ (ാീ്മയഹല ്യേുല)െ, ഉപയോഗിച്ചാണ് അച്ചടിച്ചത്. ആധുനിക അച്ചടി എന്നതുകൊണ്ട് ഉദ്ദേശിക്കുന്നത് ജൊഹാൻ ഗുട്ടൻബർഗ് രൂപപ്പെടുത്തിയതും മാറ്റിവെക്കാവുന്ന അണിയച്ചുകൾ ഉപയോഗിച്ചുള്ളതുമായ മുദ്രണത്തെയാണ്.


ആധുനിക അച്ചടി, ഫ്യൂഡൽ ഭാഷാവ്യവഹാരങ്ങളുടെ നിരാസം,
ആധുനിക മലയാളഗദ്യത്തിന്റെ വികാസം

യൂറോപ്യൻ ആധുനികതയുടെ ആത്യന്തിക ഫലം സാമൂഹികബന്ധങ്ങളിലുണ്ടായ പരിണാമവും ആ പരിണാമം മനുഷ്യനെക്കുറിച്ചുള്ള ദർശനത്തിലുണ്ടാക്കിയ മാറ്റവുമാണ്. തുല്യപൗരത്വമാണ് (ലൂൗമഹ രശശ്വേലിവെശു) ആധുനികതയുടെ കാമ്പ്. ജന്മിത്ത സാമൂഹികബന്ധങ്ങളുടെ അടിത്തറയായി നിലനിന്നിരുന്ന ഉടമ-അടിമ ബന്ധത്തിൽനിന്ന് തുല്യപൗരത്വത്തിലേക്കുള്ള മാറ്റമെന്ന്, സാമൂഹിക ബന്ധങ്ങളിലുണ്ടായ ആ പരിവർത്തനത്തെ ചുരുക്കിപ്പറയാം. ഈ മാറ്റം പല സാമൂഹിക ഘടകങ്ങളുടെയും തുടർപ്രവർത്തനത്തിലൂടെയും ഇടപെടലുകളിലൂടെയുമാണ് യൂറോപ്യൻ സമൂഹത്തിൽ സംഭവിച്ചത്. ആധുനികശാസ്ത്രത്തിന്റെ വളർച്ചയും വിജ്ഞാനവിസ്‌ഫോടനവും, സാങ്കേതികവിദ്യയുടെ വികാസം, യന്ത്രവൽക്കരണം, വ്യവസായവൽക്കരണം, നഗരവൽക്കരണം, ജന്മിത്വത്തെ തകർത്ത് മുതലാളിത്തത്തിന്റെ ഉദയം, നവോത്ഥാനം, നവീകരണം-ഇങ്ങനെ സമകാലികമായോ തുടർച്ചയായോ സംഭവിച്ച കുറെ കാര്യങ്ങൾ.
കോളനി ആധുനികത കേരളത്തിൽ ശതാബ്ദങ്ങളായി നിലനിന്നുപോന്ന ജന്മിത്തത്തിന്റെ അടിത്തറ ഇളക്കി. ജന്മിത്ത സാമൂഹികബന്ധത്തിൽനിന്ന് മുതലാളിത്ത സാമൂഹിക ബന്ധത്തിലേക്കു മാറിയ കേരളസമൂഹത്തിൽ ജന്മിത്തത്തിന്റേതായ എല്ലാ ഇടപാടുകൾക്കും ഇടപെടലുകൾക്കും മാറ്റം സംഭവിച്ചു. വിദ്യാഭ്യാസം, തൊഴിൽ, ഉൽപ്പാദനം, ആചാരങ്ങൾ, വിശ്വാസങ്ങൾ, വസ്ത്രധാരണം, ഗതാഗതം, ഭാഷ, സാഹിത്യം, കല-എല്ലാമേഖലകളെയും നവീകരിക്കുകയും പുതുക്കിപ്പണിയുകയും ചെയ്തു, ആധുനികത. മേൽപ്പടി കാര്യങ്ങളിൽ ജന്മിത്തം പരിപാലിച്ചുപോന്ന വഴികളെയും രീതികളെയുമെല്ലാം ആധുനികത നിരസിച്ചു. അക്കൂട്ടത്തിൽ, ജന്മിത്തത്തിന്റെ ഭാഷാവ്യവഹാരരീതികളും സാഹിത്യസമ്പ്രദായങ്ങളും നിരസിക്കപ്പെടുകയും അവയും ആധുനികീകരണത്തിന് വിധേയമാകുകയും ചെയ്തു. ഭാഷാ സാഹിത്യരംഗത്തെ ഈ നവീകരണത്തിനു സഹായിച്ചത് ആധുനിക അച്ചടിയും പത്രമാസികകളുമാണ്.
ജന്മിത്ത കാലഘട്ടത്തിലെ ഭാഷാവ്യവഹാരം അധികാര കേന്ദ്രിതമായ ഭാഷാരൂപങ്ങളെ അംഗീകരിക്കുകയും അല്ലാത്തവയെ അധമമെന്നു കരുതി അവഗണിക്കുകയും ചെയ്യുന്ന തരത്തിലുള്ളതായിരുന്നു.1 ജന്മിത്തത്തിന്റെ സാഹിത്യരൂപമാകട്ടെ പദ്യവുമായിരുന്നു. കേരളത്തിലെ കോളനി ആധുനികത അധികാര കേന്ദ്രിതമായ ഭാഷാവ്യവഹാരങ്ങളെയും പദ്യത്തെയും നിരാകരിച്ചു. ഉച്ചഭാഷയെയും നീചഭാഷയെയും സമ്മേളിപ്പിച്ചുകൊണ്ട് ഒരു 'മധ്യമാർഗ ഗദ്യരീതി' രൂപപ്പെടുത്തുകയും അതിനെ ശൈലീശുദ്ധവും നിലവാരപ്പെട്ടതുമായ (േെമിറമൃറശലെറ) ആധുനികഗദ്യമാക്കി വികസിപ്പിക്കുകയും ചെയ്തു.2 പദ്യസാഹിത്യരൂപങ്ങളുടെ സ്ഥാനത്ത് നിരവധിയായ ഗദ്യസാഹിത്യശാഖകൾ ഉദയംകൊണ്ട് വളർന്നു. ഭാഷാസാഹിത്യങ്ങളിലെ ഈ ആധുനികീകരണത്തിന് ഉപാധിയും സഹായിയുമായി നിന്നത് ആധുനിക മലയാളം അച്ചടിയും ആദ്യകാല പത്രമാസികകളുമായിരുന്നു.

 
ഭാഷയുടെ ആധുനികീകരണവും ആധുനിക ഭാഷാവ്യവഹാരങ്ങളും
ആദ്യകാല പത്രമാസികകളിൽ

ആദ്യകാല പത്രമാസികകളിൽ ആധുനികഅച്ചടിവിദ്യയുടെ ഗുണം ലഭിച്ച രണ്ട് പ്രസിദ്ധീകരണങ്ങളാണ് 'ജ്ഞാനനിക്ഷേപ'വും 'വിദ്യാസംഗ്രഹ'വും. മലയാളം എഴുത്തിന്റെ പഴയ രീതിയെ അച്ചടിവിദ്യ നവീകരിച്ചതിന്റെ വലിയൊരു സാക്ഷ്യം 'ജ്ഞാനനിക്ഷേപ'ത്തിലുണ്ട്. ഇതാകട്ടെ അധികമാരും ശ്രദ്ധിച്ചിട്ടുമില്ല. സംസ്‌കൃത പണ്ഡിതന്മാരുടെ അധീശാധികാരത്തിൻകീഴിലായിരുന്ന മലയാളത്തിന്, സംസ്‌കൃതത്തിന്റെ വർണ്ണ വ്യവസ്ഥതന്നെ മതി എന്നുള്ള സാമ്പ്രദായിക നിലപാടിനോടുള്ള കലാപംകൂടിയായിരുന്നു ഈ നവീകരണം. ആധുനിക മലയാളഗദ്യത്തിലെ പുതിയ ഉൽപ്പന്നങ്ങളായ ഏ, ഓ എന്നീ ദീർഘസ്വരങ്ങളും അവയെക്കുറിക്കുന്ന ചിഹ്നങ്ങളും അച്ചടിയിൽ നടപ്പിലാക്കിയതിനെക്കുറിച്ചാണ് പറയുന്നത്. 'ജ്ഞാനനിക്ഷേപ'ത്തിന്റെ ആദ്യ ലക്കത്തിൽത്തന്നെ മേൽപപ്പറഞ്ഞ പുതിയ ഉൽപ്പന്നങ്ങൾ ഉപയോഗിച്ചു. പക്ഷേ രണ്ടാം ലക്കത്തിൽ കടുത്ത പിന്നാക്കംപോക്കു നടത്തി. പിന്നീട് പത്തു-പതിമൂന്നു ലക്കങ്ങൾകൊണ്ട് ക്രമേണയാണ് ആ പുതിയ ഉൽപ്പന്നങ്ങളെ 'ജ്ഞാനനിക്ഷേപം' ഭാഷയിൽ പ്രതിഷ്ഠിച്ചത്.3
ആധുനിക അച്ചടിയിലൂടെ ആധുനിക മലയാളഗദ്യത്തിനു ലഭിച്ച മറ്റൊരു ഉൽപ്പന്നമായ സംവൃതോകാരചിഹ്നത്തിന്റെ കാര്യവും ഇക്കൂടെ ചേർത്തു ചിന്തിക്കേണ്ടതാണ്. മലയാളത്തിന്റെ വർണ്ണവ്യവസ്ഥയിൽമാത്രമല്ല, വ്യാകരണകാര്യങ്ങളിലും വലിയ പ്രാധാന്യമുള്ള സംവൃതോകാരവും അതിന്റെ ചിഹ്നവും മലയാള ഭാഷയിൽ നടന്ന ആധുനികീകരണത്തിന്റെ ഫലമായിരുന്നു. 'സംവൃതോകാരം സൂചിപ്പിക്കുന്നതിനായി ഹെർമൻ ഗുണ്ടർട്ടാണ് ചന്ദ്രക്കല എന്ന ചിഹ്നം മലയാളത്തിൽ അവതരിപ്പിച്ചത്; ഇക്കാര്യത്തിൽ അദ്ദേഹത്തെ ജോസഫ് പീറ്റിനെപ്പോലുള്ളവരും വടക്കൻ കേരളത്തിൽ നിലനിന്നിരുന്ന എഴുത്തു രീതിയും സ്വാധീനിച്ചു.'4
കോളനി ആധുനികതയുടെ സൃഷ്ടിയെന്നു വിശേഷിപ്പിക്കാവുന്നതും ആധുനിക മലയാള ഗദ്യത്തിന്റെ പ്രാക്‌രൂപവുമായ മധ്യമാർഗ ഗദ്യരീതി കേരളസമൂഹത്തിൽ പ്രചരിപ്പിക്കുന്നതിൽ ആദ്യകാല പത്രമാസികകൾ വഹിച്ച പങ്ക് പ്രത്യേകം ശ്രദ്ധിക്കേണ്ടതുണ്ട്. ജന്മിത്ത കാലഘട്ടത്തിൽ, സാഹിത്യ പ്രപഞ്ചത്തിൽ നിറഞ്ഞുനിന്ന പദ്യത്തിന്റെ കടലിനു നടുവിൽ, സൃഷ്ടിക്കപ്പെട്ട ഗദ്യത്തിന്റെ ചെറുതുരുത്തിനെ ഒരു മഹാഭൂഖണ്ഡമായി വളർത്തിയത് ആദ്യകാല പത്രമാസിസകകളാണ് (പുസ്തകങ്ങളും ഇക്കാര്യത്തിൽ അവയുടേതായ പങ്കുവഹിച്ചിട്ടുണ്ട്). വായനക്കാരുടെയും എഴുത്തുകാരുടെയും പുതുസമൂഹത്തെ സൃഷ്ടിച്ചുകൊണ്ടാണ് പത്രമാസികകൾ അതു നേടിയെടുത്തത്. ആർക്കും പ്രവേശന സ്വാതന്ത്ര്യവും സഞ്ചാരസ്വാതന്ത്ര്യവുമുള്ള, എഴുത്തുകാരുടെയും വായനക്കാരുടെയും ഒരു പൊതുമണ്ഡലം സൃഷ്ടിക്കപ്പെടുകയാണുണ്ടായത്. 'അറുപത്താറാം ലക്കത്തിൽ എഴുതിയിരിക്കുന്ന എഴുത്ത കൊടുത്തയച്ച ആൾ', 'മാനസ്ഥനായ ഒരു ഹിന്ദുമതക്കാരൻ', 'ഒരു ശാസ്ത്രക്കാരൻ', 'കുന്നങ്കുളങ്ങരെനിന്നും ഒരാൾ', 'കൊച്ചിയിൽ നിന്ന ഒരു സ്‌നെഹിതൻ' എന്നിങ്ങനെ5, 'ജ്ഞാനനിക്ഷേപ'ത്തിൽ വാർത്താനിവേദനം നടത്തിയ ലേഖകരുടെ വൈവിധ്യംതന്നെ, ഇന്നാലോചിക്കുമ്പോൾ അത്ഭുതകരമാണ്.
പുതിയ ജ്ഞാനവിഷയങ്ങൾ പ്രതിപാദിക്കേണ്ടിവന്നപ്പോൾ, പത്രമാസികകൾ സ്വീകരിച്ച് പ്രചരിപ്പിച്ച പുതിയ പദങ്ങൾ ഭാഷയുടെ ആധുനികീകരണത്തിന് വലിയ ഒരളവുവരെ സഹായിച്ചിട്ടുണ്ട്. 'ജ്ഞാനനിക്ഷേപ'ത്തിലെയും 'വിദ്യാസഗ്രഹ'ത്തിലെയും ശാസ്ത്ര-സാങ്കേതിക പദാവലികൾ മാത്രംമതി, ഇക്കാര്യത്തെ സാധൂകരിക്കുന്നതിന്. ഭൂമിശാസ്ത്രം, ചരിത്രം, ദേശസംസ്‌കൃതി തുടങ്ങിയ വിവിധ വിജ്ഞാനശാഖകളിലൂടെ കടന്നുവന്ന പദങ്ങളും ഗൗരവബുദ്ധിയോടെ നിരീക്ഷിക്കേണ്ടതാണ്.
പദ്യത്തിലൂന്നിയ പഴയ സാഹിത്യവ്യവഹാരങ്ങളെ നിരസിച്ച കോളനി ആധുനികത ഒട്ടുമിക്ക ഗദ്യസാഹിത്യശാഖകളെയും മലയാളത്തിൽ പ്രതിഷ്ഠിക്കുകയുണ്ടായി. നോവൽ, ഉപന്യാസം, നിരൂപണം, നാടകം, ചെറുകഥ, സഞ്ചാരസാഹിത്യം, ജീവചരിത്രം, ആത്മകഥ തുടങ്ങിയ എല്ലാ ഗദ്യസാഹിത്യശാഖകളുടെയും ഈറ്റില്ലം ആദ്യകാല പത്രമാസികകളാണ്. സുവിദിതമായ ഈ വിഷയത്തെക്കുറിച്ച് ആവർത്തിച്ച് പറയണ്ട കാര്യമില്ല.6
ആധുനിക മലയാളഗദ്യത്തെയും അതിന്റെ വികാസ പരിണാമങ്ങളെയുംകുറിച്ചുള്ള മനനങ്ങൾ ഇന്നും നവീനമല്ല; ഫ്യൂഡൽ പാരമ്പര്യത്തിലൂന്നിയാണ് നിൽക്കുന്നത്. അതുകൊണ്ടാണ്, ചില പണ്ഡിതന്മാർ തൽക്കാലീനവും തദ്ദേശീയവുമായി പ്രത്യക്ഷപ്പെടുകയും കാലക്രമേണ തിരോഭവിക്കുകയുംചെയ്ത പല പല ഗദ്യദേശ്യഭേദങ്ങളെയും ആധുനിക മലയാളഗദ്യവികാസത്തിന്റെ വാലിൽ ചേർത്തുകെട്ടുക എന്ന പാഴ്‌വേലചെയ്ത്, പുകമറ  സൃഷ്ടിച്ച്,  ആശയക്കുഴപ്പങ്ങളുണ്ടാക്കിയത്.   ആധുനികത (ാീറലൃിശ്യേ) മലയാളഗദ്യഭാഷയുടെ രൂപത്തിലും ഉള്ളടക്കത്തിലും സൃഷ്ടിച്ച നവീകരണത്തിന്റെ  സാമൂഹികശാസ്ത്രപരവും ദാർശനികവുമായ പരിപ്രേക്ഷ്യങ്ങൾ ആധാരമാക്കിയുള്ള പഠനങ്ങൾക്കുമാത്രമേ ആധുനിക ഗദ്യവികാസത്തിന്റെ യഥാർത്ഥവഴി കണ്ടെത്താൻ കഴിയൂ. അതിനു ഉപജീവിക്കാവുന്ന, ഉപജീവിക്കേണ്ടുന്ന മുഖ്യഉപാധാനവസ്തു ആദ്യകാല പത്രമാസികകളാണ്; ഒപ്പം, അച്ചടിച്ച ആദ്യകാല പുസ്തകങ്ങളും.

കുറിപ്പുകൾ
1. ഡോ. പി.ജെ. തോമസിന്റെ അഭിപ്രായം ശ്രദ്ധിക്കുക: 'മലയാളത്തിൽ 'നീചഭാഷ', 'ഉച്ചഭാഷ' എന്നിങ്ങനെ രണ്ടുതരം ഭാഷകൾ നടപ്പിലായിരുന്നെന്നാണു മിഷ്യനറിമാരുടെ മതം. ഉച്ചഭാഷ' പ്രായേണ സംസ്‌കൃതവും നീചഭാഷ' തമിഴുചേർന്ന മലയാളവുമായിരുന്നു. ഉച്ചഭാഷ ഗ്രന്ഥാക്ഷരത്തിൽ എഴുതപ്പെട്ടിരുന്നു. കാവ്യങ്ങളും ശാസ്ത്രങ്ങളും മിക്കവാറും ആ ഭാഷയിലായിരുന്നു. 'നീചഭാഷ' ആദ്യം തമിഴക്ഷരങ്ങളിലും പിന്നീട് ഗ്രന്ഥാക്ഷരത്തിൽ നിന്ന് രൂപംകൊണ്ട മലയാളാക്ഷരങ്ങളിലും എഴുതപ്പെട്ടിരുന്നു' (1989:107,108).
2. 'ഉച്ചഭാഷയും' 'നീചഭാഷ'യും സമ്മേളിപ്പിച്ച് 'മധ്യമാർഗ ഗദ്യരീതി' വികസിപ്പിച്ചതിന്റെയും ആധുനിക അച്ചടിയിലൂടെ ആ ഗദ്യരീതി ശൈലീശുദ്ധവും നിലവാരപ്പെട്ടതുമായ (േെമിറമൃറശലെറ) ആധുനിക ഗദ്യമായി വികസിച്ചതിന്റെയും വിശദാംശങ്ങൾക്ക് ഇനി പറയുന്ന പരാമർശങ്ങൾ പരിശോധിക്കുക.: (ശ) ബെഞ്ചമിൻ ബെയിലി എന്ന കൃതിയിലെ 'ബൈബിൾ പരിഭാഷയിലൂടെ ശൈലീശുദ്ധമായ ഗദ്യത്തിലേകക്ക്' എന്ന അദ്ധ്യായം; (ശശ) ചെറു പൈതങ്ങൾക്ക ഉപകാരാർത്ഥം ഇംക്ലീശിൽ നിന്ന പരിഭാഷപ്പെടുത്തിയ കഥകൾ എന്ന കൃതിയിലെ 'ഗദ്യോന്മീലനത്തിന്റെ ഉദയക്കാഴ്ചകൾ' എന്ന ആമുഖ പഠനം.
3. കൂടുതൽ വിവരങ്ങൾക്ക് ജ്ഞാനനിക്ഷേപം പഠനവും പാഠവും എന്ന കൃതിയിലെ 'ജ്ഞാനനിക്ഷേപം ഭാഷയുടെയും അച്ചടിയുടെയും പശ്ചാത്തലത്തിൽ' എന്ന അദ്ധ്യായം പരിശോധിക്കുക.
4. 'മലയാളം റിസേർച്ച് ജേണലി'ൽ (വാല്യം 7, ലക്കം 2, മെയ് - ഓഗസ്റ്റ് 2014) ഷിജു അലക്‌സ്, സിബു സി.ജെ., സുനിൽ വി.എസ്. എന്നിവർ ചേർന്ന് എഴുതിയ 'ചന്ദ്രക്കല: ഉത്ഭവും പ്രയോഗവും' എന്ന പ്രബന്ധം പരിശോധിക്കുക.
5. ജ്ഞാനനിക്ഷേപം പഠനവും പാഠവും, പുറം 81.
6. ടി. കൃതിയിലെ 'കഥമുതൽ നോവൽ വരെ', സാംസ്‌കാരിക വിമർശവും മലയാള ഭാവനയും എന്ന ഗ്രന്ഥത്തിലെ 'അച്ചടിഭാഷ ആഖ്യാനം: 'ജ്ഞാനനിക്ഷേപ'ത്തിന്റെ വഴികൾ' എന്നീ അദ്ധ്യായങ്ങൽ പരിശോധിക്കുക.

Get In Touch

There are many variations of passages of Lorem Ipsum available, but the majority have suffered
alteration, by injected humour, or new randomised words which don’t look believable.